上次講到過聖露西亞日要聽聖詩，仲有要食 Lussenkatter！
Lussenkatter，即係Saffron bun。 步入 12月各大超市、便利店、咖啡店等地方都可以買得到。Lussenkatter 係瑞典經典聖誕食物，大部分瑞典人都會識得自己整。麵包外型呈 S 字，加上提子乾點綴，並用上世上最貴嘅香料藏紅花 （有說其價值比黃金更加高）為麵包加入獨特嘅顏色同香味。瑞典家庭喺聖誕期期間會喺早上焗嚟做小朋友嘅早餐，或者當成 Fika 時間嘅茶點。
今年我決定自己試下親手焗。做法相當花功夫，又花時間，自己搓麵團真係差啲搓到手都斷。不過，新鮮出爐嘅 Lussenkatter 帶有由藏紅花染成黃色，傳出特別嘅香氣，口感比街買嘅鬆軟。點起蠟燭，播住聖露西亞音樂，配上一杯咖啡或者 Julmust 嚟食 Lussenkatter，即時一屋充滿聖誕氣氛🎄
Search